سبعة نصايح عشان تتوقفي عن أكل السكر

السكر هو من أصعب الأشياء اللي لازم نقلع عنها، عشانه لذيذ (طِعِم) ويسبب الإدمان ويعطينا راحة مؤقتة. لكن الكلمة اللي لازم نركز عليها هنا هي "مؤقتة" ، وقت ما هو يعطينا إحساس مؤقت بالرضا، ضررها على أجسامنا أسوأ بكتير. هل تعرفي إن السكر يسبب الإدمان مثل الكوكايين؟ ايوه بالزبط!

مقالة نشرتها المجلة البريطانية للطب الرياضي كانت تقول أن السكر المضاف له تأثير على عقولنا مثل تأثير المخدرات مثل الكوكايين.

طيب، أول شي خلونا نتكلم عن كمية السكر المضاف المسموح إننا ناكلها كل يوم. حسب كلام جمعية القلب الأمريكية ، النساء أكتر شي مسموح لهم يستهلكوه 100 سعرة حرارية (حوالي 6 ملاعق صغيرة) من السكر المضاف. وعلى فكرة دكتور هاوزر يقول: "لا نحتاج إلى أي سكر مضاف ".

ثانياً: مرة مهم إننا نفهم إنه فيه نوعين من السكر

السكر الطبيعي (مسموح ناكله باعتدال): مثل الفاكهة والحليب واللبن والخضروات النشوية اللي تحتوي على سكريات طبيعية.

السكر المضاف (الإضافات السيئة): مثل شراب الذرة ، الدكستروز (سكر العنب) ، الفركتوز (سكر الفاكهة) ، السكر المقلوب ، اللاكتوز ، الرحيق وشراب الشعير، اللي هي أسماء أخرى للسكر المضاف.

اقرئي الملصق: دايم يحاولوا إخفاء السكر بأشكال كتيرة ، عشان كذا دايم اقرئي ملصقات الطعام بعناية. راقبي الكلمات اللي تنتهي بـ "وز" مثل "سكروز" و "دكستروز" ، وبرضو إلى شراب الذرة ودبس السكر وعصير القصب وغيرها.

تذكري أن السكر ما يصير فقط في الحلويات ، ولكنه موجود برضو في أغلب الأطعمة المصنعة ، يعني اقرئي الملصقات قبل أي شي تشتريه.

الحين بعد ما عرفنا بعض الأساسيات ، خلينا نتكلم عن الإدمان. إذا كنتي مدمنة على السكر ، فلا تحاولي توقفي بشكل كامل. الأفضل إنك تتخلصي من السكر تدريجيًا، وهدي بعض الطرق المفيدة :

1. خلي التغيير بسيط: الشهر الأول نبدأ بقطع حاجة واحدة أو تقليلها بشكل كبير كل أسبوع ، يعني مثلاً الأسبوع الأول نقطع المشروبات الغازية؛ وهدي قائمة بالأشياء اللي تقدري تقطعيها تدريجيًا. إذا كانت عزيمتك قوية تقدري تتخلصي من السكر بشكل كامل، بس لازم تنتبهي للأعراض اللي راح تعاني منها جسديًا وعقليًا - وهدي مقالة مفيدة لقراءة "كيفية التغلب على أعراض التخلص من السكر وإحساس أفضل من ذو قبل".

2. سويها بنفسك: بدال ما تشتري العناصر المحلاة ، اشتري غير المحلى وأضيفي التحلية بنفسك ، وبهدي الطريقة بتسيطري على كمية السكر وبتكون أكيد أقل من اللي تحطه الشركات المصنعة. على سبيل المثال: الزبادي ، الحبوب ، إلخ.

3. برنامج الاستبدال: استبدلي الحلويات بفاكهة (مو عصير). استبدلي شوكولاتة الحليب بالشوكولاتة الداكنة (75٪ كاكاو أو أعلى) وحاولي تستبدلي السكر المضاف بمواد طبيعية.

4. خلي فمك مشغول: علكة خالية من السكر طريقة جيدة عشان تقدري تسيطري على رغبتك بأكل السكر.

5. جهزي وجباتك وسناكاتك الصحية: إذا ما أكلتي لفترة طويلة، تبدئي تجوعي وتشتهي السكر، وراح تحاولي تاكلي أي وجبة خفيفة تصير قريبة منك عشان تخففي جوعك، واحتمال كبير إنها تكون مليانة سكر مضاف لو قريتي الملصق.

6. نظام الدعم: اقطعي السكر مع صديق أو قريب عشان تحفزوا بعضكم، وتبقوا على المسار الصحيح، خلوا بينكم تحدي خالي من السكر. أنشئي مجموعة واتساب واحتفلي بالانتصارات الصغيرة، واحتفلي بالمرات اللي بغيتي تاكلي فيها سكر بس قاومتي؛ أرسلي رسالة إلى المجموعة وصوري الشي اللي جالسة تحاولي تبعدي عنه بس مو قادرة. المجموعة راح تحفزك إني تقاومي هدي الرغبات.

7. إدا انحرفتي عن المسار، لا تبعدي كتير: احنا بشر في نهاية اليوم ، إذا أخذتي خطوة لورى وأكلتي سكر، ارجعي كملي طريقك زي ما انتي، لا ترجعي لخط البداية من جديد.

الإقلاع عن السكر مو سهل، عشان كدا سامحي نفسك إذا مريتي بانتكاسة وكملي من وين ما وقفتي، ترى في النهاية التقدم هو تقدم بغض النظرعن حجمه وحتى لو كان صغير.

ملاحظة أخيرة: جسمك يحتاج تقريباً أسبوعين عشان يرجع طبيعي بعد ما تقطعي السكر تمامًا.